اصدقائي الاعزاء سلطان ونانسي كل واحد منهم نزل بوست
المفروض انه بيودع فيها سنة 2008 اللي كانت اسود من الخروب عليهم هم الاتنين
حسب قولهم يعني
وان كان كل واحد على طريقته
****
****
في اللي قعد يشكر ب عمر طاهر وكام شكر لاتنين او تلاتة معاه ولا عبرنا احنا خالص
نانسي احترمتنا اكتر ونزلتلنا شكر بطريقة ابحث عن القاتل وكلمتنا بالالغاز
اهو انا بقا هعمل احسن منهم وهتكلم عن 2008 اللي بالمجمل الحمدلله كانت كويسة عليا نسبياً على اكتر من صعيد
****
****
الصعيد الشخصي
الحمدلله صحتي كويسة اي نعم في سنة 2008 سجلت اعلى رقم قياسي باصابتي بالاتهاب الرئوي تقريبا كل شهر مرتين حتى في عز الصيف
****
****
الصعيد العائلي
السنة دي متخللهاش ولا خناقة الحمدلله مع اهلي الا على خفيف
وان امي تقعد تحلفني بيها هي وابويا ان اللي في دماغها وحاساه غلط
وانا عشان مش بحب احلف كروت الموضوع طبعا وهربت منه
اوعى حد يفتكر ان اللي بتفكر فيه امي حقيقي
****
****
الصعيد العملي
يمكن دي كانت من انجح السنوات اللي عدت في حياتي على الصعيد العملي
من نجاح لنجاح اعلى منه
ومن مركز لمركز اعلى منه
اكتر من تلات مرات اترقيت
اكتر من تلات مرات خدت زيادة مرتب
ومع ذلك الضغط زاد عليا اكتر من 30 مرة وبقا فوق طاقتي عالاحتمال
****
****
يعني من الاخر السنة كانت حلوة والحمدلله
****
يبقى اهم حدث حصل في 2008 هو اني حضرت عيد ميلاد صديقي المقرب الاخضر دائما سلطان
****
اسوء حدث حصل في 2008 هو اني سافرت ورجعت من غير ما اشوف شايما اللي وصلت مصر من بعد منا سبتها باسبوع
****
اكتر حاجة كانت مميزة في 2008 وهتفضل مستمرة دايما هي ال الو بتاعة سولتو اللي شبه ال الو بتاعة فريد شوقي في فيلم الباطنية
****
اكتر يوم غريب في حياتي كان يوم الاتنين اللي اتقابلت فيه مع عدد من عضوات ايجي فيلم
بس احلى حاجة كانت في اليوم الغريب ده اني قابلت فاطمة حبيبة قلبي وياسمين هم اللي خففوا من وطئة غرابة اليوم ده
****
اطيب بني ادمة قابلتها في 2008 هي ايمان سما مصر
****
احلى وقت عدى عليا في السنة دي كان فجر 25 اكتوبر
****
احلى فترة زمنية كانت بين 5 لحد 25 اكتوبر
بما ان 26 كان يوم الكآبة العالمي
****
ما زال امجد بيحتفظ بجدارة بلقب الشخص الاكثر غموضاً
****
نانسي الاكثر جنوناً وحزناً في نفس الوقت والاقربهم لقلبي ونصي التاني
****
سولتو السوسة الكبرى صاحب احلى سلسلة قصص اطفال مغامرات مرمريتوس
****
السنة خلصت وراحت بكل حاجة فيها حلوة كانت او وحشة
سابت جوايا ذكريات هتفضل مرافقاني العمر كله
****
صحابي انا بحبكم
انتو احلى حاجة حصلت في عمري مش بس في سنة 2008
ومعادنا يا رب يكون ليلة وداع ال2009 وجهاً لوجه لا على التلفون ولا عالنت
يا رب ده يحصل
يا رب في سنة 2009 اغير شغلي اللي اكتفيت منه خلاص
ويا رب سنة 2009 تمحي كل الاحزان اللي حصلتلكم في 2008 وتبقى سنة خير وسعادة عالجميع
