بنسمع كتير عن نظرية حافظ مش فاهم
يعني بنلاقي ناس بتشتغل تلقائيا ومش عارفة هي بتعمل ايه
مجرد معلومات متخزنة في دماغها بتفرغها من غير ما تعرف حتى ليه
ولو عدلتهم حاجة بسيطة هتلاقيهم وقفوا مش عارفين يعملوا اي حاجة
بس الفترة دي انا بطبق نظرية انيل من دي بتقول لا حافظ ولا فاهم
نظرية جديدة بطبقها في شغلي الجديد اللي اتفرض عليا من غير حتى ما اخد فرصة اني اقول عايزة او مش عايزة
واوعى حد يفهم غلط ان مع الترقية دي شغلي القديم راح لا طبعا ده شغل جديد بالاضافة للي عندي
كان الاتفاق اني اخد مهلة افكر
بس سبحان الله بعد ساعة بالظبط لقيتني ابتديت شغل
يعني من الاخر اتحطيت قدام امر واقع
ولقيت نفسي بشتغل حاجة انا من ايام الكلية مكنتش بحبها
والمشكلة الاكبر اني لقيت نفسي لوحدي
من غير ما حد يعلمني
لقيت نفسي بدور عشان اعرف الحاجات تتعمل ازاي
منكرش اني من ساعتها وانا قادرة اوفق بين شغلي والشغل ده
منكرش اني برجع البيت وانا مش قادرة اشوف قدامي
ومنكرش اني مقصرتش بحق شغلي ولا بحق الشركة
بس في نفس الوقت انا مش فاهمة انا بشتغل ايه
ولا حتى حافظة وبطبق النظريات
بقيت عاملة زي اللي اترمى في بحر وهو ميعرفش يعوم
لا انا فاهمة بشتغل ايه
ولا عارفة بعمل ايه
والمصيبة الكبرى اني بعمل الشغل صح
اول مرة احس اني حمار
حمار معرفش يقول لا
حمار مش فاهم ولا حافظ
