لازم اتعالج

اول مرة اعرف اني بجد محتاجة دكتور نفساني

حالة القرف والاشمئزاز اللي عندي تجاه جنسية معينة بتزيد

انا بعرف وبعترف اني مش بحبهم

وبعترف اني بتفادى الكلام عنهم

بس انها توصل معايا لاني اقرف حتى امسك بطاقة هوية حد منهم واصورها

يبقى فعلا انا محتاجة علاج

ده انا بعد ما صورت البطاقة قعدت اغسل ايديا جامد وحتى جبت من السوبر ماركت مواد مطهرة عشان حالة القرف اللي جاتلي

لا انا فعلا محتاجة علاج

عـــنــــدي كـــام ســــنـــة

هو انا عندي كام سنة

سؤال غريب بحاول اعرفله اجابة

مع ان المفروض ان الاجابة سهلة

ومسجلة على البطاقة والباسبور

وكارت التأمين

مرمورة طفلة

كلمة سمعتها كتير ومن اكتر من حد

بيحسوا زي ما انا بحس اني طفلة

اوقات بحس اني عندي 8 سنين

واوقات بحس اني لسة يا دوب 15 سنة

بحس اني عايزة العب واغني وارقص وافرح

ببقى مش شايلة مسؤولية اي حاجة ولا انفع اشيل مسؤولية اي حاجة

واوقات تانية بحس اني كبيرة اوي

وبشيل مسؤوليات ضخمة

ابويا بيسمعلي انا بس بكل حاجة تتعلق بالامور المادية اللي تخص عيلتنا

مديري بيعتمد عليا في كل حاجة تخص الشغل وبيسيب ليا الحرية المطلقة في الاختيار

من شوية بصيت في المراية

حسيت اني كبرت

كبرت اوي

كلها 6 شهور ويبقى عندي 30 سنة

بس يا ترى انا بجد عندي 30 سنة او 8 سنين

او يمكن 15

مش عارفة

Even If you Stop Loving me

It's Ok

I Didn't Love You Because

You Love Me

But Just Because

I Love You

عادي دي نظريتي في الحب

مفيش مشكلة لو اللي بحبه بطل يحبني

ده مش هيقلل من درجة حبي ليه

حتى لو منفعش نكمل مع بعض

مهو من الاول انا محبتوش عشان هو بيحبني

انا حبيته عشان انا بحبه

وحتى لو معدش يحبني هفضل احبه عشان بحبه وخلاص

ده رايي في الحب

سولتو دايما بيقول ان رايي في الحب متخلف مش مجرد مختلف

كل واحد حر برأيه

وده رايي

عادي يعني

نــــقــــطـــة ضـــعـــفـــي

فترة طويلة عشتها

مسيطرة فيها على كل كبيرة وصغيرة في حياتي

مخفتش من حاجة

ولا اترددت قدام حاجة

عشان عارفة ان معنديش نقطة ضعف

لحد ما عرفتك

وبقيت انت نقطة ضعفي

ارجوك

اوعى في يوم تستغلها ضدي

11 October

اليوم ده انا مستنياه بفارغ الصبر

بعد الايام اللي فاضلة

وعلى اد منا مستنياه

على اد منا مش عايزاه يجي

عشان عارفة انه لازم هيجي ولازم هيعدي ويخلص

وارجع اعد من تاني

اسوء احساس ممكن يعيشه بني ادم

مش عايزة اعيشه تاني

شكلي اتجننت

اقــــربــــلي حــــتــــى مــــنـــــي

في شخص حابة اتكلم عنه

بس كلام الكون كله ما هيكفي

عشان يعبر

مفيش حد خالي من العيوب

بس هو يكاد ان يكون

the perfect man

خمس سنين وشوية

هي فترة معرفتنا لبعض

اقدر اقول انه

اقربلي حتى مني

صـــــورة

من الغباء انك تبني حياتك على وهم

انك تخلي حد هو مركز اهتمامك كله

ترفعه اوي

تحطه جوة برواز ضخم

تبصله فوق

وتفضل ترفعه لحد ما تخليه حتى اعلى من انك تشوفه واضح

كلنا بشر

الملايكة مش بتعيش عالارض

مـــــيــــن بــــيــــتـــوجــــع اكـــتـــر

بمناسبة السفر والناس اللي بتسافر والناس اللي قريب هتسافر

موضوع خطر ببالي

اكيد الوداع وحش على كل الاطراف

ومش من السهل تسلم على حد بتحبه وتمشي وانت عارف انك مش هتقدر تشوفه تاني قبل فترة طويلة او حتى قصيرة

بس السؤال اللي بيخطر على بالي مين اللي بيتوجع اكتر

الشخص اللي بيسيب المكان والناس ويسافر يروح مكان تاني

سواء كان المكان الاصلي بتاعه او لا

والا الشخص اللي بيفضل في نفس المكان واللي مشي ده حد عزيز عليه

يا ترى لو عدى على مكان كانو بيكونو فيه مع بعضهم هيحس بايه

طب اللي سافر ده مفيش مكان في موطنه الاصلي بيفكروا باللي سابهم

مع ذلك مش بينساهم

بجد نفسي اعرف مين اللي بيتوجع اكتر

اللي بيمشي

او اللي بيفضل

مــــــفــــــيــــــش ... فـــــايــــــدة

حـــلــــوة ... مـــــــرّة

الذكـــريــــات

مـــحـــفـــورة فـــيـــنـــا ... مـــا تـــتـــمـــحـــيـــش

عـــلـــشـــان

الــــمــــاضــــي جــــه ... وفــــات

بــــس

الــــلــــي جـــاي... مــــمــــكــــن مــــيــــجـــــيــــش