في ناس بطبعها لما تحب تدي اقصى ما عندها
ما تبخلش بحاجة من وقت وصحة واعصاب وحنان وحب وفلوس
مش ضروري تدي لشخص حبيب او اخ او صديق
ممكن حتى يكون شيء غير ملموس ممكن يكون شغل
بس الحياة عامة هات وخد اديني واديك
واي حاجة تدي فيها مفروض تاخد مقابل
بس لما تلاقي نفسك بتدي وما بتاخدش
او بمعنى اصح اللي بتديه اكتر بكتير من اللي بتاخده
وحتى اللي بتاخده يرجع يتاخد منك من نفس المكان او الشخص او او اللي اداهولك
وتلاقي نفسك لسة مستمر في العطاء
ولسة مش عارف تعمل وقفة مع نفسك وتنهي المغامرة
يبقى قمة الغباء
لما تبقى بني ادم حساس زيادة
وتداري حساسيتك بقناع من اللا مبالاة والقسوة
لانك ما تحبش حد يشوفك وانت في لحظات ضعفك
والاكتر من كدة انك حتى قدام نفسك بتتظاهر بالقوة
وتخبي المك وتنكر جرحك
يبقى قمة العبط
لما تبتدي تلعب شخصية الغامض
وتفرح ان الناس بتلاقي صعوبة في معرفة اللي بتفكر فيه
وتستمر في اللعبة لحد ما غموضك يسيطر عليك
وتوصل لمرحلة انك تبقى غريب عن نفسك بحجة ان كدة اريح
يبقى قمة السخافة
لما تدي الدنيا طناش
واي حاجة تقابلك او تحصلك تقول مفيش مشكلة
لما تبقى لا مبالي تجاه اي حاجة تتكسر جواك
وتهتم باقل حاجة تحصل للي حواليك
لما تهمل في نفسك وتقول معلش بكرة افوق والملم اللي اتكسر واصلحه
يبقى قمة الاهمال
الحياة مراحل
الحياة تجارب
الحياة مغامرة
ممكن نكسب فيها كتير
وممكن بلحظة نخسر كل حاجة
بس احساس المغامرة جميل
حلو نخاطر ونجرب وما نستقرش بمكان واحد
الدنيا واسعة
ومش محصورة بمحيط ضيق بنخلقه لنفسنا
بس بلاش واحنا ماشيين مشوارنا
ندوس على ناس حبونا
ولو خسرت حبيب ما تندمش
ولو خسرت صديق ما تحزنش
اكيد جواك منهم ذكرى جميلة حتفضل منورة
وتصبحوا على خير
No comments:
Post a Comment